ភ្នំពេញ៖ នាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានបញ្ចប់ការធ្វើចត្តាឡីស័ក និងត្រលប់ធ្វើការងារធម្មតាឡើងវិញបន្ទាប់ពីការធ្វើតេស្តបញ្ជាក់ថាសម្ដេចអវិជ្ជមានកូវីដ-១៩។

សម្ដេចតេជោបានបញ្ជាក់ក្នុងហ្វេសបុកផេកផ្លូវការរបស់សម្ដេចថា៖ «បងប្អូនជនរួមជាតិជាទីគោរពស្រឡាញ់! ក្រោយពីការធ្វើតេស្តជាថ្មីម្តងទៀតខ្ញុំត្រូវបានបញ្ជាក់ថាអវិជ្ជមានកូវីដ-១៩។ ហេតុដូចនេះខ្ញុំត្រូវបញ្ចប់ការធ្វើចត្តាឡីសក័និងចេញធ្វើការងារធម្មតាឡើងវិញ។ សូមជូនបងប្អូនជនរួមជាតិសូមជួបតែសេចក្តីសុខសេចក្តីចម្រើន»។

កាលពីថ្ងៃសុក្រសប្ដាហ៍មុននាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានប្រកាសថាសម្ដេចកំពុងដាក់ខ្លួននៅដាច់ដោយឡែកដើម្បីតាមដានសុខភាព និងធ្វើតេស្តរកជំងឺកូវីដ-១៩ បន្ទាប់ពីសម្ដេចបានប៉ះពាល់ផ្ទាល់ជាមួយនឹងអ្នកមានផ្ទុកជំងឺនេះ។ ទោះជាយ៉ាងណានៅថ្ងៃច័ន្ទនេះសម្ដេចបានបញ្ជាក់ហើយថាសម្ដេចពុំមានឆ្លងជំងឺនេះនោះទេ៕